Metal detectors gipanghatag ni Mayor Evangelista

You are here: Home


NEWS | 2018/09/18 | LKRO


thumb image

BIENTE ka mga metal detectors ang gihatag ni Mayor Joseph A. Evangelista, sa lima ka grupo aron makatabang sa pagpalig-on sa kahapsay ug kalinaw sa Kidapawan City.

Kagahapong adlawa (September 17), personal nga turnover sa mayor ang nasampit nga mga butang sa Kidapawan City PNP, pinaagi kang Supt. Ramil Hojilla, ang bag-uhay lang nakumpirma nga full pledge chief of police sa dakbayan.

Lima ka mga metal detectors ang pagagamiton sa Kidapawan City PNP, 3 sa Civil Security Unit nga naa sa overland terminal, 3 alang sa CSU sa mega market, 4 ang gihatag sa Barangay Peacekeeping Action Team (BPAT) ug Special Action Team (SAT) ug 5 alang sa Task Force Kidapawan.

Kahinumduman nga sa natigayong Ciy Peace and Order Council (CPOC) meeting, gikanayon ni Mayor Evangelista, nga ang metal detectors makatabang aron siguruhon nga luwas ang mga Kidapawenos sa unsa man matang sa bahad sa mga malaing tawo.

Gimando sa mayor nga tanang mga tawo nga musulod sa mega market ug sa overland terminal, kinahanglan nga muagi sa makuti nga pagsusi ang ilang bitbit nga mga butang aron masiguro nga luwas sa pagpamomba ang dakbayan.

Sugo kini sa mayor human sa natigayon nga pagbusikad sa mga bomba sa Isulan, Sultan Kudarat, Cotabato City, General Santos City ug sa Midsayap Cotabato.

Gi awhag ni Mayor Evangelista, ang mga katawhan nga sa kanunay mag amping ug mag maigmat aron kalikayan ang susamang mga hitabo dindi sa Kidapawan.

Nanawagan sab ang mayor sa tanang business establishments apil ang mga dagkung transport groups nga mugamit usab ug mga metal detectors aron siguruon ang kaluwasan sa mga biyahero ug mga katawhan. (CIO/wam)

Si Supt. Ramil Hojilla, hepe sa Kidapawan City PNP, nanguna sa pagpang-apud apud sa mga metal detectors nga gi hatag ni Mayor Joseph A. Evangelista.



@ 2015 Kidapawan City. All rights reserved.

Developed and Maintained by: Durian Studio